نهار تعرمو عليا الزبايل فنهار واحد

عرفتوا طار عليا النعاس و جيت للمنتدى هاد البلية اللي تبليت بيها وحسيت برغبة باش نحكي ليكم على واحد القصة وقعات ليا و اليوما فكراتني فيها أختي .
كان بقى لعيد الكبير نهار و طلبت من الزين الصافي ديال راجلي - هاد الوصف كنقولو ليه مللي كيطلّع ليا الدم بالعصبية ديالو - طلبت منو يمشي معايا نشوفو الحولي ديال أختي ، مابغاش و عييت نطلب و نزاوg
"حشومة راه أختي و راجلها جاو شافو الكبش ديالنا هالعار دّيني نشوف ديالهم باش ما يبقاش فيها الحال ! "
وتgول واش قضيت فيه صح ولا باطل، شوية جاتني فكرة و قلت ليه:"
أنا مازال خصني الزبيب و البرقوق و المشماش ، وحتى الأمواس ما مضّيناهمش ،هادي فرصة حجّة و زيارة نزلو لمدينة القديمة نديرو الواجب و نتقضاو معانا ."
صدقات ليا وهزيت القفة باش ندير فيها الجناوا ومشينا نديرو صلة الرحم ، و هو غادي معايا بحال إيلا غاديين باليهودي للجامع ...
سوْلني : " اختك عارفانا جايين عندها ؟ ."
حركت رأسي بالإيجاب وكنطلب الله نلقاوها ..
المشكلة وصلنا لدار الأخت ديالي- السايح بو دربالة - مالقيناهاش و الدار مسدودة ، وصوت بو القرون مجلجل !!! بديت نلقى ليها الأعذار واقيلا فالسطح أو عند الجيران أو ..علاه هو جاوبني عاقد غوباشة ، شوية جات -الزين الصافي - كانت كتتقضى فالمارشي ، بغات تحل الباب مالقاتش الساروت ، كيبان ليا راجلي كيعض فقنوفتو قلت ناري حْماضَت كَحّلتها .....
بدات تقلب فجيوبها فالقب ديال الجلابة والووو خصها تعيط فالتيلفون على راجلها من قرطاخنة باش يجي يحل الباب .......حلف راجلي ما يتسنى ولا دقيقة وقال ليا يالله نرجعو لدارنا دابا ..
وتيكرر فواحد القولة المغلوطة :لمرأة تْشاوَرْ معها و ماتديرش بالرأي ديالها . "
دزنا خدينا البرقوق و الزبيب و المشماش وخلصتو ، وهو ماكيتكلمش معايا مخنزر يالطيف ...وحواجبو للسماء ، صافي بقاو لينا الجناوا نمضيوهم وقفنا عند الرجل سولني شحال من جنوي قلت ليه جوج صافي ، أيوا .... خشيت يدي فالقفة لقيت - يدي و الطاس - مالقيت والو بديت نقول ليه :"راالويلة البنت الي تعاونني نسات و مادارتش ليا الجناوا فالقفة هي دايما مدوخة ."
اللهم نلصقها فيها الله يسامح ليا حتى نفلت من هاد الورطة وملي نرجع للدار نطلب منها المسامحة ...ياك ؟
واخا بررت المشكل ما اقتنعش و بدا يغوت : "لهلا يمضّي بوهم هاد الجناوا ولهلا يذبح بوه شي حولي ، ولهلا يْعَيْد gاع ."
راكم عارفين الرجالة مللي تطلع ليهم القردة للسطح ..
اختكم ضرباتها بسكتة درت راسي دريويشة ، وبديت نطلب السلامة ونقول مع نفسي عالله ما يسوّلنيش على البرقوق وماجاوره بقاو عند الراجل ..
وتأكدت أنه شي أيام تيتجمعو فيهم الزبايل والمصائب ، ولكن بيني و بينكم وقتما رفض يمشي لشي بلاصة ولصقتو كندير زبايل ..
الله يحفظكم من هاد المواقف قولوا أمين ..